ہم ہندوستان میں سات کروڑ گھر بنا رہے ہیں: مودی

گاندھی نگر۔(ایجنسی)وزیر اعظم نریندر مودی نے پیر کو یہاں کہا کہ ہم ہندوستان میں سات کروڑ گھر بنا رہے ہیں۔ یہ دنیا کے کئی ممالک کی آبادی سے زیادہ ہے ۔مسٹر مودی نے صبح گاندھی نگر میں پی ایم سوریہ گھر مفت بجلی اسکیم کے استفادہ کنندگان سے بات چیت کے بعد گجرات کے گاندھی نگر میں مہاتما مندر میں چوتھی عالمی قابل تجدید توانائی سرمایہ کار سمٹ اور ایکسپو (ری انویسٹ) کا افتتاح کیا۔

اس دوران انہوں نے کہا کہ”آپ سب جانتے ہیں کہ ہندوستانی عوام نے 60 سال کے بعد مسلسل تیسری بار کسی حکومت کو اقتدار دیا ہے ۔ ہندوستان ہماری حکومت کی تیسری مدت کے لیے بڑی خواہشات رکھتا ہے ۔آج 140 کروڑ ہندوستانیوں، نوجوانوں اور خواتین کو یقین ہے کہ گزشتہ 10 برسوں میں ان کی امنگوں کو پنکھ لگے ہیں ۔ وہ اس تیسری مدت میں ایک نئی پرواز لیں گے ۔ ملک کے غریب، پسماندہ، مظلوم، استحصال زدہ اور محروموں کو یقین ہے کہ ہماری تیسری مدت ان کی باوقار زندگی گزارنے کی ضمانت دے گی۔وزیر اعظم نے کہا کہ 140 کروڑ ہندوستانی اس عزم کے ساتھ کام کر رہے ہیں کہ ملک کو تیزی سے تین بڑی معیشتوں میں لے جایا جائے ۔ یہ ایک بڑے وژن، ایک بڑے مشن کا حصہ ہے ، یہ 2047 تک ہندوستان کو ایک ترقی یافتہ ملک بنانے کے ہمارے ایکشن پلان کا حصہ ہے ۔انہوں نے کہا کہ ہمارے پہلے 100 دن ہماری ترجیح، رفتار اور پیمانے کی بھی جھلک دیتے ہیں۔ اس عرصے کے دوران ہم نے ہر اس شعبے اور عنصر پر توجہ دی ہے جو ہندوستان کی تیز رفتار ترقی کے لیے ضروری ہے ۔انہوں نے کہا، ان 100 دنوں میں فزیکل اور سوشل انفراسٹرکچر کی توسیع کے لیے بہت سے اہم فیصلے کیے گئے ہیں۔
ہمارے غیر ملکی مہمان جان کر حیران ہوں گے کہ ہم ہندستان میں سات کروڑ گھر بنا رہے ہیں۔ یہ دنیا کے کئی ممالک کی آبادی سے بھی زیادہ ہے ۔ حکومت کی پچھلی دو میعادوں میں ہم نے چار کروڑ گھر بنائے ہیں اور تیسرے دور میں ہماری حکومت نے تین کروڑ نئے گھر بنانے کا کام بھی شروع کردیا ہے ۔