شہادت علی اصغر امام حسین کی حقانیت کا ثبوت : مولانا کلب جواد

لکھنو۔امام باڑہ غفران مآب میں محرم الحرام کی نویں مجلس کو خطاب کرتے ہوئے مولانا سید کلب جوادنقوی نے کہاکہ قرآن مجید میں اللہ نے اعلان کیاہے کہ ہم سب کو آزمائش میں مبتلا کریں گے۔گذشتہ امتوں کا بھی امتحان ہواہے اور قیامت تک آنے والی ہر نسل کا امتحان ہوگا۔امتحان میں کامیابی کے لئے ضروری ہے کہ گذشتہ امتوں کی تاریخ کا مطالعہ کیاجائے۔قرآن مجید نے عبرت کے لئے سابقہ امتوں کے واقعات بیان کئے ہیں مگر افسوس ہم ان واقعات سے درس عبرت نہیں لیتے۔

مولانانے دوران تقریرکہاکہ دین کی حفاظت کے لئے معصوم کا ہونا ضروری ہے۔اللہ نے ابتدائے کائنات سے تا قیام قیامت دین کی حفاظت کے لئے معصوم اور مقدس ذوات کو رکھا ہے۔آج بھی پردہ غیب میں ہمارا آخری امام موجود ہے جو کائنات کی بقا اور ہدایت کا ضامن ہے۔مجلس کے آخرمیں مولانانے کربلا کے شہیدوں کی تشنگی کا بیان کیا۔خاص طورپر امام حسین کے فرزند حضرت علی اصغر کی شہادت کا واقعہ بیان کیا ،جس کی عمر چھ ماہ تھی۔مولانانے کہا کہ امام حسین کی حقانیت کے اثبات کے لئے ششماہے مجاہد حضرت علی اصغر کی قربانی کافی ہے ،اس لئے آپ کی شہادت کو زیادہ سے زیادہ بیان کیاجانا چاہیے۔مجلس کے بعد انجمن ہای ماتمی نے نوحہ خوانی و سینہ زنی کے فرائض انجام دیئے ۔نوجوانوں نے زنجیر زنی اور قمہ زنی کرکے شہیدان کربلا کو خراج عقیدت پیش کیا۔