’ایکلا چلو سے مغربی یوپی میں’’انڈیا‘کو چیلنج دے پائیں گی مایاوتی؟

لکھنو۔جیسے جیسے لوک سبھا انتخابات قریب آرہے ہیں، سیاسی پارٹیوں کے درمیان شہ مات کا کھیل تیز ہوگیا ہے۔ بہوجن سماج پارٹی کی صدر مایاوتی نے گزشتہ بدھ کے روز آئندہ انتخابات اپنے بل بوتے پر لڑنے کا اعلان کیاہے۔

اس کی وجہ سے مغربی اتر پردیش میں اپوزیشن اتحاد’انڈیا‘ ایک نیا چیلنج پیدا کر سکتا ہے۔ مغربی اتر پردیش کو بی ایس پی کا گڑھ سمجھا جاتا ہے۔ ایسے میں مغربی یوپی میں اپوزیشن کے درمیان ووٹوں کی تقسیم کی وجہ سے’’انڈیا‘ نقصان اٹھانے کا خطرہ ہے۔ تاہم گزشتہ دو انتخابات کے بعد سے مسلم ووٹر بی ایس پی سے دور ہو گئے ہیں۔ دلت رائے دہندگان میں بھی سیندھ لگ گئی ہے۔ اسی لیے سیاسی ماہرین کو اس بات کا خدشہ ہے کہ کیا بی ایس پی 2024 میں اکیلے الیکشن لڑ کر مغربی یوپی میں کوئی بڑا کرشمہ کر پائے گی۔اگر پروفیسر جسویر سنگھ کی بات مانی جائے تو مایاوتی کی رسائی 10 فیصد دلتوں (جاٹوں) کے ساتھ ساتھ انتہائی پسماندہ ذاتوں میں بھی رہی ہے۔ مسلم ووٹر بھی کئی انتخابات میں مایاوتی کے ساتھ رہے ہیں۔ آج ہر پارٹی انتہائی پسماندہ ووٹروں کے لیے سنجیدہ ہے۔ بی جے پی کی پوری توجہ اس پر ہے۔ ایسے میں اگر مایاوتی ’’انڈیا‘‘ اتحاد میں شامل ہوتی تو اتحاد مزید مضبوط ہوتا۔
2019 کے لوک سبھا انتخابات کے دوران بی ایس پی اور ایس پی نے مل کر مقابلہ کیا تھا۔ بی ایس پی نے مغربی یوپی میں سہارنپور، بجنور، امروہہ کی سیٹوں پر قبضہ کیا تھا۔ بلدیاتی انتخابات میں مسلم ووٹروں نے خود کو بی ایس پی سے دور کیا۔ پارٹی کا ایک بھی میئر نہ جیت سکا۔ نگر پنچایت صدر اور میونسپلٹی صدر بھی گنتی کے رہے ہیں۔ اس لیے اپنا وجود دکھانے یا برقرار رکھنے کے لیے 2024 کا الیکشن ان کے لیے کرو یا مرو جیسا ہے۔ مغربی یوپی میں بی ایس پی مسلسل کمزور ہوتی جارہی ہے۔
بی ایس پی 1984 میں قائم ہوئی تھی۔ بی ایس پی کو پہلی بڑی کامیابی 1993 میں ایس پی کے ساتھ اتحاد میں ملی تھی۔ 12 ایم ایل اے والی پارٹی کو 1993 میں 67 سیٹیں ملی تھیں۔ بی ایس پی نے 164 اسمبلی سیٹوں پر الیکشن لڑا تھا۔ ایس پی نے 256 سیٹوں پر الیکشن لڑا اور 109 سیٹیں جیتیں۔ لیکن بی ایس پی نے 18 ماہ بعد ہی اتحاد توڑ دیا۔ اس کے بعد 1995 میں وہ بی جے پی کی حامی بن گئیں۔ بی ایس پی نے 1996 کے اسمبلی انتخابات کانگریس کے ساتھ مل کر لڑے تھے۔ بی ایس پی نے 67 اور کانگریس نے 33 سیٹیں جیتیں۔ بعد میں مایاوتی نے کانگریس سے اتحاد توڑ دیا۔ اس کے بعد وہ بی جے پی کی حمایت سے وزیر اعلیٰ بنیں۔