نوجوان مہاتما گاندھی کوپڑھیں، ان کی زندگی کے فلسفے کو اپنائیں: مرمو

صدر جمہوریہ ہند نے گاندھی درشن میں مہاتما گاندھی کے 12 فٹ اونچے مجسمے کی نقاب کشائی کی

نئی دہلی۔ (یو این آئی) صدر دروپدی مرمو نے پیر کو ملک کے شہریوں بالخصوص نوجوانوں اور بچوں سے مہاتما گاندھی کے بارے میں زیادہ سے زیادہ پڑھنے اور ان کے نظریات کو اپنانے کی اپیل کی۔محترمہ مرمو نے کہا کہ گاندھی جی کے آدرش اور اقدار ہمارے ملک اور سماج کے لیے بہت اہم ہیں اور ان کا راستہ ہی عالمی فلاح اور عالمی امن کا واحد راستہ ہے ۔

صدر نے یہاں گاندھی درشن میں گاندھی جی کے 12 فٹ اونچے مجسمے کی نقاب کشائی کی اور کمپلیکس میں ‘گاندھی واٹیکا کا افتتاح کیا۔اس موقع پر انہوں نے تمام شہریوں بالخصوص نوجوانوں اور بچوں سے اپیل کی کہ وہ گاندھی جی کے بارے میں زیادہ سے زیادہ پڑھیں اور ان کے نظریات کو اپنائیں اور کہا کہ اس سلسلے میں گاندھی اسمرتی، درشن سمیتی اور اس طرح کی دیگر تنظیموں کی حوصلہ افزائی کی جانی چاہیے ۔صدر جمہوریہ نے کہا کہ کتابوں، فلموں، سیمیناروں، کارٹونوں اور دیگر ذرائع ابلاغ کے ذریعے گاندھیائی تنظیمیں نوجوانوں اور بچوں کو گاندھی جی کی زندگی کی تعلیمات سے زیادہ واقف کر سکتی ہیں اور گاندھی جی کے خواب کے ہندوستان کی تعمیر میں اہم کردار ادا کر سکتی ہیں۔محترمہ مرمو نے کہاکہ مہاتما گاندھی پوری عالمی برادری کے لیے ایک وردان ہیں۔ ان کے نظریات اور زندگی کی اقدار نے پوری دنیا کو ایک نئی سمت دی ہے ۔ انہوں نے ایسے وقت میں عدم تشدد کا راستہ دکھایا جب عالمی جنگوں کے دوران دنیا نفرت اور بغض کی زد میں تھی۔انہوں نے کہا کہ گاندھی جی کے سچائی اور عدم تشدد کے تجربے نے انہیں ایک عظیم انسان کا درجہ حاصل کیا۔ صدر نے کہا کہ ان کے مجسمے کئی ممالک میں نصب ہیں اور پوری دنیا کے لوگ ان کے نظریات پر یقین رکھتے ہیں۔ انہوں نے نیلسن منڈیلا، مارٹن لوتھر کنگ جونیئر اور براک اوباما کی مثالیں دیتے ہوئے کہا کہ بہت سے عظیم رہنما گاندھی جی کے دکھائے گئے سچائی اور عدم تشدد کے راستے کو عالمی فلاح کا راستہ سمجھتے ہیں۔ انہوں نے اس بات پر زور دیا کہ ان کے دکھائے ہوئے راستے پر چل کر عالمی امن کا ہدف حاصل کیا جا سکتا ہے ۔صدر جمہوریہ نے کہا کہ گاندھی جی نے عوامی اور ذاتی زندگی میں پاکیزگی پر بہت زور دیا۔ ان کا ماننا تھا کہ اخلاقی طاقت کی بنیاد پر ہی عدم تشدد کے ذریعے تشدد کا مقابلہ کیا جا سکتا ہے ۔