فنچ کی سنچری، آسٹریلیا نے پاکستان کو ہرایا

شارجہ،(یو این آئی ) کپتان آرون فنچ (116) کے دھماکہ خیز سنچری اور ان کی شان مارش (ناٹ آؤٹ 91) کے ساتھ دوسرے وکٹ کے لئے 172 رن کی زبردست شراکت کی بدولت آسٹریلیا نے پاکستان کو پہلے ون ڈے میں جمعہ کو آسانی سے آٹھ وکٹ سے ہرا کر پانچ میچوں کی سیریز میں 1-0 کی برتری حاصل کرلی۔آسٹریلیا کی یہ مسلسل چوتھی ون ڈے جیت ہے ۔

آسٹریلیا نے اس سے پہلے ہندستانی دورے میں پہلے دو ون ڈے گنوانے کے بعد اگلے تین ون ڈے مسلسل جیت کر سیریز کو 3-2 سے اپنے نام کیا تھا۔ آسٹریلیا نے ہندستان کی کارکردگی کو پاکستان کے خلاف سیریز کے پہلے میچ میں بھی برقرار رکھا ہے ۔پاکستان نے حارث سہیل کے 114 گیندوں پر چھ چوکوں اور ایک چھکے کی مدد سے بنے 101 رنز کی بدولت 50 اوور میں پانچ وکٹ پر 280 رن کا مضبوط اسکور بنایا لیکن آسٹریلیا نے 49 اوور میں دو وکٹ پر 281 رنز بنا کر میچ جیت لیا۔مین آف دی میچ فنچ نے 135 گیندوں پر آٹھ چوکوں اور چار چھکوں کی مدد سے 116 رنز کی زبردست اننگز کھیلی۔ مارش نے 102 گیندوں پر ناٹ آوٹ 91 رن میں چار چوکے اور دو چھکے لگائے ۔ عثمان خواجہ نے 24 اور پیٹر ھینڈاسکمب نے ناٹ آؤٹ 30 رن بنائے ۔پاکستان کے 281رنز کے ہدف کے تعاقب میں آسٹریلیا کے لیے عثمان خواجہ اور ایرون فنچ نے اننگز کا آغاز کیا اورپہلی وکٹ کے لیے 63رنز جوڑے جس کے بعد عثمان خواجہ24رنز بنا کر فہیم اشرف کا شکار بنے ،ایرون فنچ اور شان مارش نے دوسری وکٹ کے لئے 172رنز جوڑے اور اس دوران فنچ نے اپنی12 ویں سنچری بھی مکمل کی جس کے بعد فنچ116رنزا سکور کرکے محمد عباس کی پہلی ون ڈے وکٹ بنے ،مارش اور ہینڈا سکومب نے 46رنز کی ناقابل شکست شراکت قائم کرکے ٹیم کو کامیابی دلائی ، مارش 91اور ہینڈ اسکومب 30رنز کے ساتھ ناٹ آؤٹ رہے ،پاکستان کے لیے فہیم اشرف اور عباس نے 1 ،1وکٹ لی ۔اس سے قبل پاکستانی ٹیم کے کپتان شعیب ملک نے ٹاس جیت کر پہلے بیٹنگ کرنے کا فیصلہ کیا ۔ امام الحق اور شان مسعود نے اننگز کا آغاز کیا لیکن امام 35 رنز کے مجموعی اسکور پر 17 رنز بنانے کے بعد ناتھن لیون کے ہاتھوں کیچ آؤٹ ہوگئے ۔ شان مسعود اور حارث سہیل نے دوسری وکٹ کے لئے 43رنز جوڑے جس کے بعد شان مسعود بھی 40 رنز کی اننگز کھیل کر پویلین واپس لوٹ گئے ۔عمراکمل اور حارث سہیل نے تیسری وکٹ کے لئے 98رنز کی شراکت قائم کی اور اس دوران حارث سہیل نے اپنی11ویں نصف سنچری بھی مکمل کی جس کے عمر اکمل بڑا شاٹ لگانے کی کوشش کرتے ہوئے 3 چھکوں کی مدد سے 49رنز بنا کرکولٹر نائل کا شکار بن گئے ،کپتان شعیب ملک میکسویل کے اوور میں چھکا اور چوکا لگانے کے بعد11رنز بنا کر بولڈ ہوگئے ،حارث سہیل اور فہیم اشرف نے پانچویں وکٹ کے لیے 49رنز جوڑے جس کے بعد فہیم اشرف24رنز بنا کر آؤٹ ہوئے ، عماد وسیم نے جارحانہ بیٹنگ کرتے ہوئے 13 گیندوں پر 23 رنز بنائے ، ان کی اننگز میں 4 چوکے اور ایک چھکا شامل تھا ،حارث سہیل نے اپنی پہلی ون ڈے سنچری مکمل کی،وہ101رنز بناکر ناٹ آؤٹ رہے ۔آسٹریلیا کی جانب سے کولٹرنائل اور میکسویل نے 2،2 اور ناتھن لیون نے ایک وکٹ حاصل کی۔