گہلوت نے بیپرجوئے سے متاثرہ علاقوں کا فضائی سروے کیا

جے پور۔ (یو این آئی) راجستھان کے وزیر اعلی اشوک گہلوت نے منگل کو بارمیڑ ضلع میں طوفان بپرجوئے سے متاثرہ علاقوں کا فضائی سروے کیا۔مسٹر گہلوت نے ضلع کے چوہٹان، دھناؤ اور آس پاس کے علاقوں میں سروے کرنے کے بعد متاثرہ لوگوں سے بھی ملاقات کی۔ متاثرین سے بات چیت کرتے ہوئے وزیر اعلیٰ نے کہا کہ ریاستی حکومت نے بپرجوئے کو سنجیدگی سے لیتے ہوئے پیشگی تیاری کی تھی۔ تاہم کچے مکانات، مویشیوں اور اسکول کی عمارتوں کو نقصان پہنچا ہے ۔ محکمہ موسمیات کے حکام کے ساتھ مسلسل تال میل برقرار رکھا جا رہا ہے ۔

انہوں نے کہا کہ متاثرہ علاقوں میں سروے کر کے قواعد کے مطابق معاوضہ دیا جائے گا۔ اس کے لیے افسران کو ہدایات دے دی گئی ہیں۔مسٹر گہلوت نے کہا کہ بپرجوئے کے آنے سے پہلے ہی 15 ہزار سے زیادہ لوگوں کو منتقل کردیا گیا تھا۔ اس کے ساتھ ہی ریسکیو ٹیموں نے تقریباً دو ہزار افراد کو بچا کر محفوظ مقامات پر پہنچایا ہے ۔ ڈیزاسٹر فرینڈز، سول ڈیفنس نے بھی راحت اور بچاؤ کے کاموں میں اہم کردار ادا کیا ہے جس میں ایس ڈی آر ایف کی 17 ٹیمیں اور این ڈی آر ایف کی آٹھ ٹیمیں اور فوج بھی شامل ہے ۔ ریاست میں تباہ شدہ سڑکوں، بجلی کے کھمبوں اور ٹرانسفارمروں اور دیگر نقصانات کی جلد از جلد مرمت کے لیے افسران کو ہدایات دی گئی ہیں۔مسٹر گہلوت نے عام لوگوں سے اپیل کی ہے کہ وہ ندی یا دیگر پانی بھری جگہوں پر نہ جائیں۔ بچوں کو تیراکی سے نہ روکیں اور پانی کے تیز دھاروں میں پیدل یا گاڑی سے نہ گزریں۔ کسی بھی ناخوشگوار واقعے کی صورت میں فوری طور پر انتظامیہ کو اطلاع دیں۔اس دوران ڈیزاسٹر منیجمنٹ اور امدادی وزیر گووند رام میگھوال، باڑمیر کے ایم ایل اے میوارم جین، ضلع کلکٹر ارون کمار پروہت اور پولیس سپرنٹنڈنٹ دیگنت آنند بھی موجود تھے ۔ مسٹر گہلوت نے پیر کو وزیر اعلی کی رہائش گاہ پر بپرجوئے طوفان سے ہونے والے نقصانات کے بارے میں ایک جائزہ میٹنگ بھی کی اور افسروں کو ہدایت دی کہ وہ صورتحال اور راحتی کاموں پر مسلسل نظر رکھیں اور راحتی کاموں کو چلانے کے لیے فضائیہ اور فوج کے ساتھ تال میل قائم کریں۔ڈیزاسٹر منیجمنٹ، ریلیف اور شہری دفاع کے محکمے کے حکام کی طرف سے میٹنگ میں بتایا گیا کہ اس طوفان کی وجہ سے باڑمیر، جالور، پالی، سروہی اور راجسمند اضلاع میں بہت زیادہ بارش ہوئی ہے ۔ اس کی وجہ سے گزشتہ تین دنوں میں باڑمیر میں 192.37 ملی میٹر، جالور میں 419.10، سروہی میں 464.66، پالی میں 318.70 اور راجسمند میں 251.92 ملی میٹر بارش ہوئی ہے ۔ بوندی اور سوائے مادھوپور اضلاع کے لیے ریڈ الرٹ جاری کیا گیا ہے ۔