کوٹلہ میں دہلی۔ممبئی کا ھائی وولٹیج میچ

نئی دہلی۔ (یو این آئی) آئی پی ایل ۔12 میں بہترین فارم میں نظر آ رہی دہلی کیپٹلس جمعرات کو بلند ارادوں کے ساتھ اپنے گھریلو فیروز شاہ کوٹلہ میدان پر ممبئی انڈینس کے سخت چیلنج پر قابو پاتے ہوئے پوائنٹس حاصل کرنے کے مقصد سے اترے گی۔ آئی پی ایل کے آٹھ میچوں میں سے دہلی نے پانچ جیتے ہیں اور 10 پوائنٹس لے کر وہ دوسرے نمبر پر ہے جبکہ ممبئی کی ٹیم کے بھی 10 پوائنٹس ہیں لیکن رن ریٹ کی بنیاد پر وہ تیسرے نمبر پر ہے ۔

دہلی نے پچھلا میچ سن رائزرس حیدرآباد سے اسی کے میدان پر 39 رن سے جیتا تھا جس سے اس کا حوصلہ کافی بلند ہے اور وہ گھریلو میدان پر بھی اسی سلسلے کو برقرار رکھتے ہوئے ہر حال میں اپنی پوزیشن مضبوط کرنا چاہے گی۔ ممبئي نے گزشتہ میچ میں رائل چیلنجرس بنگلور کو پانچ وکٹ سے شکست دے دی ہے اور وہ بھی دہلی کو برابری کی ٹکر دینے کے لئے تیار نظر آرہی ہے ۔ دونوں ٹیموں کے درمیان کوٹلہ کے میدان پر مقابلہ برابری کا تصور کیا جا سکتا ہے لیکن گھریلو حالات میں دہلی کو مزید فائدہ ہو سکتا ہے جس نے اپنے آخری تین میچ بنگلور، کولکتہ اور حیدرآباد سے جیتے ہیں۔ دوسری طرف روہت شرما کی کپتانی میں ممبئی کافی اتار چڑھاؤ سے گزر رہی ہے اور اس میں تسلسل کا فقدان ہے ۔ اس نے پنجاب سے میچ جیتنے کے بعد راجستھان سے اگلا میچ گنوایا تھا، لیکن گزشتہ میچ میں فہرست کی سب سے نچلی ٹیم بنگلور کو شکست دے کر واپسی کر لی۔ کوٹلہ کی سست پچ پر ممبئی کے بلے بازوں کو کچھ جدوجہد کرنی پڑ سکتی ہے ، اگرچہ روہت، اوپنر کویٹن ڈی کاک، سوریہ کمار یادو، آل راؤنڈر ہاردک پانڈیا کی صورت میں ٹیم کے پاس اچھے کھلاڑی ہیں۔ ہاردک نے گزشتہ میچ میں بنگلور کے خلاف آل راؤنڈر کھیل کا مظاہرہ کیا تھا اور 16 گیندوں میں پانچ چوکے اور دو چھکے لگا کر ناٹ آؤٹ 37 رن کی اننگز سے ٹیم کی جیت میں اہم کردار ادا کیا تھا۔ عالمی کپ ٹیم کا حصہ ہاردک ایک بار پھر فنیشر کے کردار میں ہوں گے جبکہ گیند بازی میں لست ملنگا، جسپریت بمراھ، ہاردک اور کرونال پانڈیا ممبئی کے اہم کھلاڑی ہیں۔ بنگلور کے خلاف میچ میں ملنگا 31 رن پر چار وکٹ لے کر سب سے کامیاب ثابت ہوئے تھے ۔ دوسری طرف دہلی کی ٹیم اپنے بلے بازوں شیکھر دھون، پرتھوی شا، کپتان شریئس ایر اور رشبھ پنت پر منحصر ہے ۔ عالمی کپ ٹیم سے باہر رہنے والے پنت کی کارکردگی پر سب کی نگاہیں رہیں گی جنہیں قومی ٹیم کا حصہ نہ بنائے جانے پر فی الحال کئی طرح کی وجوہات سامنے آ رہی ہیں۔ حیدرآباد کے خلاف گزشتہ میچ میں کولن منرو اور شریئس نے 40 اور 45 رنز کی اہم اننگز کھیلی تھیں جبکہ گیند بازوں میں ایشانت شرما، کیگسو ربادا، کرس مورس، پٹیل اور امت مشرا اہم ہیں۔ ربادا ٹیم کے اہم گیند بازوں میں شامل ہیں جنہوں نے گزشتہ میچ میں 22 رن پر چار وکٹ حاصل کئے تھے وہیں کیمو پال 17 رن پر تین وکٹ لیکر مین آف دی میچ رہے تھے ۔ ممبئی کے مضبوط بلے بازی آرڈر کو روکنے کے لئے ان سے اسی کارکردگی کو دہرانے کی توقع کی جائے گی۔