امیٹھی/بہرائچ(یواین آئی) کانگریس جنرل سکریٹری و مشروی اترپردیش کی انچارج پرینکا گاندھی واڈرا نے اتوار کو امیٹھی میں بی جے پی کی حب الوطنی پر سوالیہ نشان لگاتے ہوئےکہا کہ حقیقی نیشنلزم لوگوں کے مسائل حل کرنا ہے۔پرینکا نے وزیر اعظم کے ذریعہ انتخابی ریلیوں میں اپنے ذات کا تذکر ہ کرنے پر بھی سوال اٹھایا۔ایک عوامی چوپال سے خطاب کرتے ہوئے پرینکا نے کہا کہ ’’میں نہیں جانتی کہ بی جے پی کی حب الوطنی کیسی ہے جسے کسانوں کی بدحالی ، نوجوانوں، خواتین اور دیگر افراد کی کوئی فکر نہیں ہے۔ کانگریس جنرل سکریٹری نے کہا کہ یہ کافی مایوس کن ہے کہ جب کسان بغیر جوتے کے آپ کے دروازے پر جاتا ہے تو آپ اس کی بات سننے میں کوئی دلچپسی نہیں لیتے، نوجوانوں کو روزگار دینے کے جھوٹے وعدے کئے گئے، نیشنلزم کا مطلب ملک کے تئیں عوام کا اعتقاد ہے اور ملک کا مطلب عوام ہیں۔ لیکن جب عوام سے دھوکہ دھڑی کی جاتی ہے تو پھر نیشنلزم کا کیا ہوگا۔پرینکا نے نریندر مودی کے ذریعہ انتخابی ریلی میں اپنے ذات پر سیاسیت کرنے کا الزام لگاتے ہوئے ان پر حملہ کیا۔ انہوں نے کہا کہ میں مودی کے ذات کے بارے میں نہیں جانتی۔ کانگریس نے الیکشن کے درمیان ذات کا استعمال نہیں کیا اور ہمیشہ انتخابات کے دوران ترقی کو الیکشن کا اہم ایجنڈا بنانے کی کوشش کی۔ ہم ان کے ذات کے بارے میں نہیں جاننا چاہتے اور نہ ہی ہم نے ان پر کوئی ذاتی تبصرہ کیا ہے لیکن کس چیز نے انہیں مجبور کیا کہ وہ اپنی ذات بتاتے پھر رہے ہیں یہ ایک سنگین معاملہ ہے۔ کانگریس جنرل سکریٹری نے مرکزی وزیر اسمرتی ایرانی کو بھی اپنی تنقید کا نشانہ بنایا انہوں نے دعوی کیا کہ اسمرتی پانچ سالوں میں صرف 16 بار امیٹھی آئیں ہیں اور اب وہ یہاں کے ووٹروں سے ہمدردی کا اظہار کررہی ہیں۔ پرینکا نے کہا کہ ہر بار جھوٹی پبلیسٹی کے لئے چار سے پانچ گھنٹے کے لئے آئی اور میڈیا میں سرخیاں بٹورنے کے لئے جوتے، ساڑیاں تقسیم کرتی ہیں۔ لیکن میں اس بات سے اچھی طرح سے واقف ہوں کہ امیٹھی کے عوام کافی خودار ہیں اور کبھی بھی ایسے لیڈر کو قبول نہیں کریں گے جو ان کو فقیر سمجھتا ہو۔واڈرا نے کہا کہ وہ امیٹھی یہاں کے عوام کے مسائل کو جاننے کے لئے آئی ہیں اور اسے بعد میں حل کرنے کی کوشش کریں گی۔ہم نے ہمیشہ ہی امیٹھی کو اپنے گھر کی طرح جانا ہے اور یہاں کے لوگ ہمارے خاندانی اراکین کی طرح ہیں۔پرینکا رائے بریلی اور امیٹھی میں روزانہ صبح انتخابی مہم چلاتی ہیں اور پھر اس کے بعد اپنے متعینہ پروگرام کے تحت ریاست کے دوسرے حصوں میں انتخابی تشہیر کے لئے روانہ ہوجاتی ہیں۔امیٹھی اور رائے بریلی میں 6 مئی کو ووٹ ڈالے جائیں گے۔
کانگریس جنرل سکریٹری پرینکا گاندھی واڈرا نے بھارتیہ جنتا پارٹی(بی جے پی) پر کسانوں کے بے عزتی کا الزام لگاتے ہوئے کہا کہ عوام سے دور ہوچکی مرکز کی نریندر مودی حکومت چنندہ سرمایہ کاروں کے فلاح میں مشغول ہے۔محترمہ واڈرا نے اتوار کو بہرائچ کے نانپارہ میں ایک عوامی ریلی سے خطاب کرتے ہوئے کہا کہ بی جے پی حکومت نے کسان سمان ندھی اسکیم کے تحت ہر سال 6 ہزار روپئے دیکر ان کی بے عزتی کی ہے۔ اسے’’ کسان اپمان یوجنا‘‘ کہا جائے تو بے جا نہ ہوگا۔ کانگریس نے اپنے انتخابی منشور میں کسانوں کو غریبی اور بدحالی سے باہر نکالنے کے لئے ان کا قرض معاف کرنے اور ہر سال 72 ہزار روپئے دینے کی پیشکش کی ہے ۔انہوں نے کہا کہ مودی حکومت نے اپنے میعاد کار کے دوران صرف خود کا اورا پنے چنندہ سرمایہ کار دوستوں کا ہی بھلا کیا ہے۔ اس کے برخلاف کانگریس کا نظریہ عوام کے مفادکا ہے۔ جب میں کسانوں سے ملتی ہوں تو وہ بتاتے ہیں کہ آوارہ مویشی کی وجہ سے رات بھر انہیں جاگنا پڑتا ہے۔ منریگا کے مزدوروں کو چھ چھ مہینے پیسے نہیں ملتے ۔ کانگریس کی حکومت آنے پر کسان کے لئے علیحدہ بجٹ بنایاجائےگا۔کانگریس جنرل سکریٹری نے کہا کہ آج جو ادارے آپ کا تحفظ کرتے ہیں ان کو توڑا جارہا ہے۔ عوام پریشان اور دکھی ہیں۔ بی جے پی نے سچائی اور خدمت کی سیاست چھوڑ دی ہے۔ کانگریس کی حکومت آنے پر 12 ویں جماعت تک تعلیم مفت دی جائے گی۔ میری سمجھ سے سب سے بڑا نیشلزم یہی ہے کہ آپ عوام کے درمیان جائیں اور ان کے مسائل کو سنیں۔انہوں نے ریلی میں موجود لوگوں سے اپیل کرتے ہوئے کہا کہ آپ کانگریس امیدوار ساوتری بائی پھولے کو کامیاب بنائیں گے تو بہرائچ کے مسائل حل ہوں گے۔ آنے والے وقت میں ہماری حکومت بنتی ہے تو سب سے پہلے اس حلقے میں جو سیلاب متاثرین ہیں ان کے لئے مناسب اقدام کئے جائیں گے اور زمینی طور پر اس کی لڑائی لڑی جائے گی۔محترمہ واڈرا نے کہا کہ آنے والے وقت میں طبی سہولیات مفت فراہم کی جائیں گی۔
المزيد من القصص
پٹنائک کاغذ کی مدد کے بغیر اوڈیشہ کے اضلاع کے نام بتائیں: مودی
کانگریس۔ سپا کا کردار رام اور ملک مخالف کا:یوگی
کانگریس چھوڑنے والے لیڈر کا انکشاف ‘شہزادے ’ کا ارادہ رام مندر پر سپریم کورٹ کےفیصلہ کو بدلنے کا: مودی