وزیراعظم مودی نے نیشنل سائنس فاؤنڈیشن میں خیالات کا کیا اشتراک

واشنگٹن۔(یو این آئی) وزیر اعظم نریندر مودی نے امریکہ کے الیگزینڈریا، ورجینیا میں نیشنل سائنس فاؤنڈیشن میں کہا کہ وہ ہندوستان اور امریکہ کے درمیان تعلیم اور تحقیق میں باہمی تعاون کے لئے کچھ خیالات کا اشتراک کرنا چاہتے ہیں ۔ اس مشترکہ کوشش میں حکومت، صنعت، اکیڈمی، اساتذہ اور طلباء کو شامل کرنے کی ضرورت ہے ۔مسٹر مودی اور ڈاکٹر بائیڈن نے نیشنل سائنس فاؤنڈیشن کا دورہ کیا۔ دونوں رہنماؤں نے امریکہ اور ہندوستان کی طالبات سے بھی ملاقات کی جو اپنی دونوں معیشتوں کے لیے ضروری صنعتیں بنانے کے لیے ہنر ،مندی کی تعلیم حاصل کررہے ہیں۔وزیر اعظم نے کہا ‘‘میں بہت خوش ہوں کہ مجھے آج واشنگٹن آتے ہی بہت سارے نوجوان اور تخلیقی ذہنوں سے بات چیت کرنے کا موقع ملا’’۔

مسٹر مودی نے کہا کہ ہندوستان نیشنل سائنس فاؤنڈیشن کے ساتھ مل کر کئی پروجیکٹوں پر کام کر رہا ہے ۔ اس لیے یہ خاص ہے ۔ انہوں نے کہا کہ ڈاکٹر بائیڈن، آپ کی زندگی، آپ کی کوششیں اور آپ کی کامیابیاں تحریک کا ذریعہ ہیں۔ یہ ہم سب کی ذمہ داری ہے کہ ہم اپنی موجودہ اور آنے والی نسلوں کے بہتر مستقبل کو یقینی بنائیں۔ اس روشن مستقبل کے لیے تعلیم، ہنر اور اختراع ضروری ہے اور ہندوستان میں ہم نے اس سمت میں بہت کوششیں کی ہیں۔انہوں نے کہا کہ ہم نے اسکولوں میں تقریباً دس ہزار اٹل ٹنکرنگ لیب قائم کی ہیں۔ جہاں بچوں کو مختلف ایجادات کے لیے ہر قسم کی سہولیات فراہم کی جارہی ہیں۔ ہم نے نوجوان کاروباریوں کی حوصلہ افزائی کے لیے اسٹارٹ اپ انڈیا مشن شروع کیا ہے ۔ ہمارا مقصد اس دہائی کو ٹیکنالوجی کی دہائی بنانا ہے ۔مسٹر مودی نے کہا کہ آج ہندوستان اور امریکہ کی رفتار کو برقرار رکھنے کی اشد ضرورت ہے ، جہاں امریکہ کے پاس اعلیٰ معیار کے تعلیمی ادارے ہیں، جدید ٹیکنالوجی ہے ، وہیں ہندوستان میں نوجوانوں کی دنیا کی سب سے بڑی فیکٹری ہے ۔ اس لیے مجھے یقین ہے کہ ہندوستان-امریکہ کی شراکت داری پائیدار اور جامع عالمی ترقی کا انجن ثابت ہوگی۔ انہوں نے کہا کہ میں ان کا تہہ دل سے شکریہ ادا کرتا ہوں اور آپ سب کو امریکہ میں کمیونٹی کالجز کی جانب سے اس کردار کے لیے مبارکباد پیش کرتا ہوں۔وزیر اعظم نے کہا کہ میں ہندوستان اور امریکہ کے درمیان تعلیم اور تحقیق میں باہمی تعاون کے لئے کچھ خیالات کا اشتراک کرنا چاہتا ہوں۔ انہوں نے کہا کہ ضرورت اس بات کی ہے کہ حکومت، صنعت، اکیڈمی، اساتذہ اور طلباء سب اس مشترکہ کوشش میں شامل ہوں۔ انہوں نے کہا کہ 2015 میں، اکیڈمکس نیٹ ورک پر گلوبل انیشیٹو شروع کیا گیا تھا تاکہ دنیا بھر کے سائنسدانوں اور کاروباری افراد کو ہندوستان میں اداروں کے ساتھ آگے آنے کے لیے اکٹھا کیا جا سکے ۔ مجھے یہ بتاتے ہوئے بہت خوشی ہو رہی ہے کہ اس کے تحت اب تک امریکہ سے 750 فیکلٹی ممبران ہندوستان آئے ہیں۔ انہوں نے کہا کہ میں امریکہ میں تعلیم سے متعلق کام کرنے والے پیشہ ور افراد اور ریٹائرڈ لوگوں سے درخواست کروں گا کہ وہ اپنی تعطیلات بالخصوص سردیوں کی چھٹیاں ہندوستان میں گزاریں اور ہندوستان کو جانیں اور ہندوستان کی نئی نسل کے ساتھ اپنے علم کا اشتراک کریں۔وزیراعظم نے کہا کہ میرے خیال میں دونوں ممالک کو مل کر اس پر بات کرنی چاہیے ۔ اس سے ہمیں بہت سے مسائل کا حل بھی مل سکتا ہے اور مستقبل کے لیے نئے آئیڈیاز بھی۔ انہوں نے کہا کہ وہ دن دور نہیں جب نوابونیشن کے نوجوان ہندوستان کی شمال مشرقی ریاست ناگالینڈ میں بیٹھے اپنے دوست کے ساتھ مل کر ایک آئیڈیا اور پروجیکٹ کو ایک نئی جہت دیں گے ۔انہوں نے کہا میں ایک بار پھر امریکہ کی خاتون اول جل بائیڈن کا تہہ دل سے شکریہ ادا کرتا ہوں اور نیشنل سائنس فاؤنڈیشن اور سب کا شکریہ ادا کرتا ہوں۔